洪禮賢講馬：一言為定欲罷不能

魑魅魍魉

　　做直播節目有一個好處，每當發覺有礙眼鏡頭可即時出聲，唔使等亦唔會將件事攤凍，因為之後再講番轉頭，大家對該事可能記憶模糊了，仲有可能唔記得，即時講番較易令觀眾有共鳴。當然，某些事情未必會因時間久了而令大家唔記得，譬如白德民在女皇盃手部動作緊促。而周中夜賽亦出現一樁睇完眼冤的事例，就算嚴重性不及「閒話一句」，但都唔易令人好快遺忘。

　　嘩，好一隻「牛精巨星」，跑完之後，就連走位評述員，都話即刻收到唔少友人SMS投訴。坦白說，該役蔡明紹處理手法真係嚇人一跳，所以難怪畀人口誅筆伐。正如賽後小組亦指出﹕「跑法已引起關注，且未達到其水平的騎師之水準。在情況許可下，必須確保把握有利位置，不要採取會令坐騎不必要地多走腳程的騎法，從而令坐騎在末段落後太遠。」其實，騎者都有解釋點解會「無啦啦」走出第四叠，只因坐騎沿途穩定唔到走勢。姑勿論佢嘅理由是否充分，有一點卻冇得拗，就係由二叠轉到三叠，係咪真係有咁嘅需要，似乎又唔係噃﹖﹗

蔡明紹嚇親人

　　講番今期賽事，對於第六場「一言為定」幾有好感，而其實喺上賽前已經對佢有好印象，雖然賽前試大閘唔算好有走勢，總覺亮相之時，行起上嚟有唔錯神色，加上外觀唔係差，如果唔係路短，可能會買定先。但路程短卻影響唔到佢，若然唔係陣上際遇差得冇得再差（被撞、冇位上、受困統統齊晒），唔敢講會贏得，P則幾可肯定有梗﹔既然1200米一樣追得好，轉到中程點會唔惡到出汁，唔追等幾時噃﹗