洪禮賢講馬：大旋風打衝鋒

魑魅魍魉

　　天氣預告話今日可能會有狂風雷暴，本來Ｃ＋３欄Ｃ＋6彎已經利前置跑法，再落埋大雨的話，後上馬真係更加蝕底，又係嗰句，留後追，就會衰的格局，所以檔位反而唔使太介意。

重心場次

第2場  第四班（60-40分）1000米

　　常山鳳寶近兩仗跑得唔錯，都係頂到最後幾十米先至冇Ｐ，尤其上場，壓線一步影相至冇咗個第三咋，反映落到四班有點優勢﹔回到此程更具競爭力，4檔又預期賺形勢，跑得番前仗水準，唔係冇贏面。

    　「千兩寶寶」初出1200米放得快返嚟唔斷（比同晚另一組快約5線），算佢幾本事，雖然之後傷腳冇操一大輪，希望有兩個幾月時間重新谷起狀態，進度起得切，苟如是，今次縮程應更好跑。「領航動力」捧Ｗ不智，因５年冇贏過，但今季谷草未衰過，5場全部入三甲，唔拖好似違反數據，唯一要擔心係體力問題，因之前跑得好通常都有3周時間休息。

　    「生豪」試閘反應好，睇嚟狀態入局快，如果唔係12檔，對其信心更大。

    　「可圈可点」速度夠，11檔未必克服唔到，但早段如用多咗，拉士可能冇咁貫注。「奇蹟」及「永勝寶貝」各有少少缺點，但又唔係冇權爭三甲。

第1場  第五班（40-10分）1000米

　　大情大勝1檔夾晒主動跑法，跑番此程，又會比1200米易埋尾，隻馬同德叔又夾，整體條件比對手優勝。

    　「時時有機」段段有的跑法其實在今場幾好跑，如果唔係撞到前駒，贏面幾大。「齊齊掂」本來縮回此程可提升能力，但如場地變化則會打折扣。「秒秒領先」擔心此程不及1200米有把握。「莎朗之寶」又係衰外檔，但唔排除好似上賽般拉士追到一段。「分享」又排外檔，未必再有夢幻形勢了。

第3場  第四班（60-40分）1650米

　　寶威威上賽因排外檔，前中段泊唔到埋欄，又唔到佢放頭，所以蝕晒底﹔呢次1檔正晒，用小梁只負109磅，放得出或守到好位，不難突破。

    　「燈胆寶」及「當旺」跑法近似，卻排了中外檔，未必咁易掌握到形勢，可能兩個只能活一個。

　    「現代武士」上場表現普通係正常，始終太耐冇跑，加上短途唔係佢杯茶，但開氣後即上一哩，部署嚟得急，唔似冇企圖。「友誼奧運」跑法及檔位形勢都好，不過陣上一向難靠，限於冷敲。

第4場  第四班（60-40分）1200米

　　大把在手一再展示唔錯速度，如果唔係轉場唔掂，呢次排埋3檔，好易放得出，有權帶返。「喜在心頭」連搏幾場唔知體力耗盡未，不過地慢佢冇問題，檔好兼路程理想，正路配腳。

　    「好玩」剛仗遇到鬥搶局面，全程無法回氣，直路至會冇力，今場形勢應該唔會一樣，啱發揮好多。「喜運財星」一連兩場賽事都有礙眼鏡頭，所以就算覺得隻馬有分在手，還是等一等消案才算。「神力金剛」常常受到形勢拖累，實情已具備作戰水準，如環境配合，唔難突破。

第5場  第三班（80-60分）1800米

　　旺舖福星連贏兩場，姿態雖驚險，但水準唔錯，伸算殺上三班負輕磅唔會比下去，而愈跑愈長應唔會帶來負面影響，仍有勝機。「龍的傳說」難贏，但卻經常入到前幾名，正路配腳。

　    「勝利福星」同柏寶特別夾，慢地又有根據，除非完全冇得追，如果唔係必有殺傷力。「星際雄師」係擔心相隔日子唔夠耐，體能方面應付不來。「多贏勁駒」上場入到直路無心戀戰，長期處於前路被阻劣勢，所以輸幾遠及名次大落後也不用理會，既然之前曾在同程輸近，隔兩場又返嚟，有賠率要吼住。「鎖定目標」及「旅遊小子」買Ｔ或Ｆ可拖一注。

第6場  第三班（80-60分）1650米

　　好兄弟落班即刻返強項，又配番愛將，小方搏馬心態已經出晒面，而上季同期，在差唔多分數及磅位也幾乎贏到，反映處境唔係綁手綁腳，若然淋地性能冇問題，應有三甲。

　    「重量級」配備有變動，正正用番今季唯一上過名嘅開縫眼罩，唔似冇決心，有埋１檔亦配合其跑法，隨時重現威力。「靚到爆」和「聚好盈」近績有眼見，要拖。「不老英雄」如跑慢地或可應運而生，始終近仗跑法唔啱一樣近，證明基本狀態有喺度。「超力駒」唔知係咪等降班，計分真係着數到暈。「帝豪龍駒」隔夜估唔到咁重飛，但如果又係擺在前走，邊會好噃﹖﹗

第7場  第一班（105-80分）1200米

　　美猴王預咗獨贏十幾蚊，因為谷草1200米未衰過，呢次唯一問號係變化地性能如何。「牛精巨星」夠快、１檔仲加埋眼罩，預料早段好易攞到主動權，地淋對佢有利無害，或有本事放到。

　    「高點」夜賽未嘗上名。「精彩生輝」啱啱嗰場輸在末段受阻，不過呢次12檔真係要睇際遇。「活力飛駒」贏馬一役冇形勢幫手情況下勝出，呢次11檔未必克服唔到。「孖寶神駒」上賽明顯係小將發揮唔到隻馬，但呢次配好手卻加程，把握又冇1000米咁大。

第8場  第三班（80-60分）1200米

　　大旋風連仗跑得好，假設上場早點望空，可能衝贏晒，似乎目前分數在7字頭仲係有着數，而佢跑變化地又掂，對手不易抵抗佢嘅後勁。

    　「活力至寶」唔係三班可留，今場好位更好跑。「紅褲子」唔使介意剛仗敗績，因直路屢遇塞車關係，希望今場步速利追，或有機可乘。「大進」隔夜飛數比預期冷，但向來準開。「祥勝愛駒」慢地開正佢嗰瓣。「一路順風」等到轉場便是郁手之時。