馮諾嘉手記：緣是燦爛四班惡

魑魅魍魉

　　剛戰天文台預測會有大雨及狂風雷暴，結果沙田馬場當日天朗氣清，天氣情況同天文台預測有出入，小妹早響賽前已經估到會係咁，反而諗唔到嗰日兩場盃賽會由大摩贏晒！

　　沙田銀瓶嗰場，小妹對馬女「金德寶」期望好高，估唔最終都係要輸畀「點心」。至於另一場亞視盃，方廐三雄「喜聚寶」、「競駿精英」同「藍天」圍剿摩廐「醉味」，結果都係後駒先過終點。賽馬講求實力之外，運氣一樣唔少得，大摩就實力同運氣兼備，試問仲有邊個夠佢嚟？

　　講番今期心水，第二場四班1650米，小妹揀咗「緣是燦爛」做膽，雖然呢隻馬季內表現好差，跑過十四場全部三甲不入，但評分亦由季初嘅77分減到依家嘅58分，今次落到四班上陣，即刻搵柏寶操刀，仲要抽埋個黃金一檔，係時候見真章。

　　配腳方面，「永得勝」季內四戰同程獲冠亞季殿各一，必須兼顧。「標青」上場唔放頭敗不作準，用啱跑法隨時變身。「天下寶」響四班點都有啲甜頭，咪睇小。四連環揀埋轉倉初出嘅「玩具神話」。

　　第三場四班2200米，鍾意韋達坐騎「勁好友」，近兩仗跑同程均輸條頸畀對手，未交代馬一定搏到贏為止。對手方面，「好歡騰」新勝猶勇，繼續配鄭雨滇有威脅。「電訊高星」突然增程兼強配柏寶，似乎有出擊意圖。「善風」已打叠三場上名，證明近況出色，唔排除會繼續跑近。「經典能量」近兩仗雖然大敗，但季內唯一頭馬就響同程取得，值得留意。