洪禮賢講馬：新力勁贏卡士

魑魅魍魉

　　柏寶今期騎師王熱到得十六蚊，固然係幾多好馬在手，之但係，兩位見習生梁家俊及何澤堯，亦唔係冇實力坐騎，所以除咗要睇實阿寶坐騎之外，此兩位小將嘅胯下馬也不容看淡。

重心場次

第9場  第三班（80-60分）1200米

　　旅英駿駒連續三場冇Ｗ有Ｑ，如果唔係上場出頭過早及臨尾大意，會唔會輸都真係兩睇﹔為要補中唔貪減嗰幾磅，寧願用番韋達，而初插此班也差點贏，實力應與此批馬有距離，只要唔係唔啱慢地，應贏。

    　「飛闖」前景唔會比前駒失色，剛仗一樣贏得清脆，唔係拉士遲遲才望空，至少贏一個身位以上，加七分一點也不存阻力。「蜚聲」上場走規已進一步改善，斜跑情況再少啲了，殺上三班都唔驚。

　    「幸運傳奇」由初出轉彎大波勾，到上場就算外閃也衝得唔錯，陣上能力不斷升值，今仗突換上洋將及加程，小心放冷箭。

　    「高一線」與「威馬加鞭」，不覺有本事贏到，但各有可博之處，像前駒加配件盼穩定陣上情緒，後駒縮程和好檔易掌握形勢，可視為Ｔ或Ｆ配腳。

第1場  第四班（60-40分）1000米

　　好快活前仗同程入Ｑ，而上場退步主因係末段要勒避，不用計較敗績，總之計佢前仗水準，在此一定夠爭。

    　「美酒堡」進度未夠，亦唔係短途馬，不過對其前景稍稍看好，才拖一票。「錢照贏」試大閘速度一流，大勝幾個身位，如非得個樣，一出應有成績交出。「領航人」上場一出閘慢咗，打亂晒發揮，唔輸才怪，跑番直路賽，兼跑線有利，可再畀機會。餘駒以新勝的「覓得寶」較可取了。

第2場  第四班（60-40分）1200米

　　龍得風雲如果上賽唔係拉士冇位上，未必贏唔到，顯示現階段的能力在此班好有牙力﹔今場重磅及地淋，或會令能力打折扣，尊重當弗才作膽。「駟馬難追」終於排到內檔，而加配件如令其更投入賽事，有望出頭。

    　「尊皇騰龍」一向覺得係大師傅馬，用阿杜應「食」得到呢匹走規唔好之馬，真正能力可釋放。「皇仁勁駒」加程未必會有好效果。「川河勁駒」有點台型，又係博初出可監生吞。

第3場  第三班（80-60分）1400米

　　多贏勁駒兜兜轉轉在此程再露一手，可能目前仍未能掹上一哩或以上，集中跑1400米，處理實際。「戶外名駒」有本事揮低「歡樂繽紛」，三班惡到暈，此類好開都轉倉之馬，唔憂第一回合唔出手。

　    「高手」上賽用嚟行頭，但今場的形勢及條件是兩碼子的事了。「勝利飛駒」唔係跑慢地一定會拖。「歡呼星」好欄及輕磅，加上小休儲夠體力，已可留意。「飛快勇」完全唔知點解近仗可以一步都冇，論評分已冇乜壓力，之前大閘亦肯走，如冷得太緊要，拖一注作保險。

第4場  第五班（40-10分）1200米

　　甜蜜至上揀開，就算轉場都唔放手，尤其今場配搭更正。「喜鵲」唞過，養番好後喺工夫上加壓，如進展唔係差，呢個分隨時上到名。

    　「齊鼓掌」近兩仗在陣上的演繹完全唔同，似乎放頭仲好，預期換人後的跑法也會較進取。「時時有機」前跟力唔曳，在變化地賺到跑法之利。「高駿」跑出水準在五班屬一線馬。「晨速」久不久會近，但此程略短，爭Ｐ居多。

第5場  第四班（60-40分）1400米

　　招積仔變化地性能好，而上賽係個幾月以來首次上陣，末段衝勁尚可收貨﹔如喼到體力，呢次檔靚夾啱跑法，爆得。「真奇寶」地淋最開心，檔差也不怕。

    　「旅遊大亨」跑法左右了成績，但呢次肯縮程，料會用回留前鬥後戰略，可再畀機會。「幸運相架」慢地好啱放。「好小子」唔係易操控，新接手未必即刻發揮到。「龍船旺」如跑1200米可能更好把握，不過上場塞車都輸近係有跟進價值。

第6場  第四班（60-40分）1600米

　　新意思在田草贏到冇對手可埋到身，的確估佢唔到﹔加十磅係難消化，但新勝馬當銳或可克服。「愛睦善」長期在四班有得揮，只視乎賽事形勢會否因９檔而失利。

    　「喜綵」無啦啦上場又跑番好，不過演出波動性較大之馬，隨時一招了。「吉利多」跑了三場1600米，後追及置前都試過，效果普通而已。「高明威威」如非剛仗直路頭受妨礙，影響了之後發揮，可能會追得再近啲，總之賽績已呈穩健性，可跟。「長春樹」縮程未必應付得來。

第7場  本地三級賽 (95分或以上) 1200米

　　同一世界實力和穩定性在此數一數二，多馬搶，應該啱佢追。「金德寶」轉程可能冇咁惡，不過有地利。

    　「好友福」剛仗略嫌跟得較前，如因應步速快，今次做啱留放，或可提升名次。「紅衣司令」唞一大輪復出，安排與上季差唔多，體力夠，唔敢批死。「極奇妙」場地唔夠快，優勢消失。

第8場  第一班（120-100分）1600米

　　新力勁近兩季跑親一班賽都有表現，級數值得尊重，加上由之前對開嘅「步步穩」、「鳥語花香」，變了此棚對手，點都贏點卡士。

    　「競駿精英」忠心馬好番，機會看俏。「喜聚寶」場地愈淋愈叻。「花好月圓」唔鍾意縮程。「藍天」輸級數但近況高企。「醉味」上場唔係拉士騎者手部緊促，走勢一定更加有威脅，換人冇可能會比下去﹗「陽明好好」係驚９檔難於早段泊位。

第10場  第二班（100-80分）1200米

　　步步快喼得到陣上的演出，進度呈上升勢頭，估計返回此程會更叻。「富高勝」分數未摸頂，變化地性能也冇問題，第二勢力。

    　「相見歡」難得演出向來出色，冇理由唔拖。「披星戴月」隔夜飛唔知點嚟﹖但重新喼到跑頭，要小心。「永勝多」係要擔心小將能否騎得起。「牛精金星」唔係大外檔會揀。「快樂小子」路短等開氣後加程。