馮諾嘉手記：威威福星唔怕重磅

魑魅魍魉

　　今晚谷草八場賽事跑B欄C彎，睇番上次B欄賽果，頭馬當中有領放，有中置，亦有後上，但大部分贏嘅馬都係一早貼欄守好位，所以內檔馬可以秤先。

　　精選場次第四場四班一哩，用「威威福星」做膽，今季多仗未嘗一勝，不斷減分之下，上場跑同程，後上只以四分三馬位之差得第三，今次乘勇再戰，當然係想取得久違嘅頭馬，班次有利，重磅都冇有怕。配腳先拖「皇帝旨令」，呢匹新西蘭自購馬喺香港跑咗八場，跑過草地同泥地都未有突出表現，上場初次轉戰谷草謀突破，但因為排九檔被迫走外叠落敗，今場不但出王牌報名，仲回配韋達，騎者埋門親試，擺明重視，今次抽四檔，形勢比上場有利得多。「好友緣」嚟香港後一直積極減分，由二班降到落嚟四班，近仗賠率已經冇咁冷落，亦有啲走勢，今場排二檔更有利，出閘後即可貼欄守好位，負磅又輕，不妨拖埋。「心頭好」九歲老馬今季狀態一直保持，近兩場表現都唔差，退役前搏得實搏，柏寶埋門連操多課，可惜排大外檔，惟有作配。

喜在心頭B欄醒

　　第五場四班1200米，「喜在心頭」近兩場獲冠亞各一，上場黎海榮騎，只係以頸位之差未能追到嘅「太陽昇」，今次配番前次贏馬嘅杜利萊，前仗排二檔，同樣係跑B欄，形勢一樣，騎練明刀明熗，做膽。配腳先拖上場爆出99倍大冷W嘅「偉龍」，其次係「成功年代」，上場大熱輸近，相信今場亦可跑入前列，「贏啲啲」近戰不勝有位，亦可兼顧。

　　第八場二班1800米，馬膽「卓爾非凡」，轉入摩廐後幾次跑田草1600米有好表現，近兩場輸亦只係距頭馬半個馬位，未能打開勝門騎練當然唔服氣，今次轉場謀出路之餘，1800米嚟香港前已經贏過，仲配番白德民，操練亦非常積極，絕對係有晒準備。配腳方面，近仗連番入位嘅「愛跑得」，仲未開齋實好鬥志，仲有二檔之助，要拖。「沙貝利」連贏四場之後，上場末段受阻而敗，回配韋達兼排黃金一檔，前列分子。「漂亮第一」近兩仗跑田草僅敗，跑谷草避開強手，要兼顧。