盧森堡遇高盧雞必然劣細

猪拉多纳

世盃外歐洲區A組賽事，榜首法國今晚會作客包尾嘅盧森堡，雖然牌面上兩隊強弱懸殊，不過法國自上年歐國盃決賽飲恨後正重建，領隊迪甘斯仲未搵到最佳進攻戰術，作客面對死守球隊往往老鼠拉龜，而且盧森堡近年進步神速，已經好少畀人大炒，今仗中位數3.5球嘅入球細不妨一試。

（有線62及202周日凌晨3時45分直播）

法國隊人才輩出，今次點兵「高盧雞」中前就有「3G」基奧特、基沙文同加美路助陣，首度入選嘅「新亨利」基利安洛天，更加係近期歐洲炙手可熱嘅超新星，不過呢班前鋒最擅長玩速度同靈活，面對密集防守較難發揮，唯一柱躉中鋒基奧特狀態麻麻，加上保羅普巴因傷落選，迪甘斯又未搵到一套有效嘅進攻程式，都幾濕滯。

睇番法國隊喺世盃外成績，連同上屆世盃外在內，「高盧雞」近7仗世盃外作客只入得7球，當中有6仗總入球係2球或以下，效率極低，而且所遇嘅對手有白俄羅斯、格魯吉亞、芬蘭等玩「龜縮」嘅弱旅，盧森堡今仗極有可能照辦煮碗，中位數3.5球嘅「細」盤絕對值得支持。
踢完4輪僅負4球

主場嘅盧森堡畀人印象係超級魚腩，以往面對世界級勁旅輸十球八球都係等閒事，不過佢哋近年其實進步好大，對住荷蘭同瑞典都只係輸2球同1球，目前踢咗4輪賽事得失球差只係負4球，可見盧森堡已非吳下阿蒙，絕對有力令守強攻弱嘅法國遇上麻煩，「入球細」放心捧場。