馮諾嘉手記：歡樂繽紛食硬尾胡

魑魅魍魉

　　韋達停賽，蔡約翰出戰馬亦唔算踴躍，十一場賽事只有六匹參戰馬，其中交畀潘頓操刀嘅「好利利」同「歡樂繽紛」都係機會馬，難得韋達停賽，有啲咁好嘅馬騎，潘頓一定搏到盡。

　　第六場四班1200米，用「好利利」做膽，至今三仗非冠即位，上場跑同程更輕勝個幾馬位，質新大勇，實力仲有排未見底，再戰同程大可連捷。

　　配腳有「風動寶」、「飛闖」同「確威星」，四連環揀多匹季內三度獲亞仍未開齋嘅「軍士」。「風動寶」至今跑過四仗全部入三甲，所以此駒絕對係「好利利」最大威脅。睇番「風動寶」上場跑同程只係輸畀「進勝福星」一條頸，今場乘勇再戰，仲強配柏寶，配腳首選。「飛闖」初出跑田草1000米直路賽，雖然落第但走勢不弱，上場報爭盃賽，強配白德民，可惜因為氣管內有膿痰而要退出，小休後早前試課大閘跟跑而回，但走勢輕鬆，配腳要拖。「確威星」初出跑田草1200米贏馬開齋，之後增程表現曳，今場回師臝馬路程，要兼顧。

　　尾場一班1600米，用「歡樂繽紛」做膽，至今六仗獲四冠兩亞，成績犀利，由四班贏到二班，可以話銳不可當，上場於韋達胯下跑同程勝出，姿態又係易到不得了。配腳首選上場不敵「歡樂繽紛」獲亞、戰強配柏寶嘅「卓爾非凡」。季內獲一冠三亞狀態大勇嘅「醉味」亦要拖，而「藍天」由初次登場嘅何澤堯操刀，海外賽事佢臝唔少頭馬，大家不妨睇下佢功架，四連環揀多匹連贏四場嘅「沙貝利」。