洪禮賢講馬：超群如意未摸頂

魑魅魍魉

　　柏寶復出，自不然會反撲，當然韋達唔係紙板人，加上跑埋呢期要停賽，點都特別賣力，但如果睇佢兩位今日啲馬，大圍計數，阿寶嗰批抵博多少，所以追開韋達嘅馬友，呢次未必咁易又話三兩場Ｗ閒閒哋。

第1場  第四班（60-40分）1800米

　　壽比南山打叠贏同程，姿態冇點變，都係輕輕鬆鬆，加至中磅仍未覺有咩阻力。「越跑越有」根本就係中長途材料，轉到1800米唔會適應唔嚟。

    　「勁擊」陣上處理得啱，基本上在呢班成日可以有威脅。「喜綵」一再令人失望，加程未必即刻有幫助。「森林活泉」及「濰坊」一對後上型馬，遇着一場或出現正常偏快少少的場合，應會受惠。

第2場  第三班（80-60分）1200米

　　清風送爽剛仗出閘慢執輸，但拉士都好誇張吓，復課操練加大力度，轉場仲好，要睇實。「駿蹄飛」上場見識到真正能力，轉場唔擔心，只係驚11檔加阿杜，沿途或會攞位蝕章而已。「共創未來」初出行圈冇神冇氣，一樣追到入Ｐ，所負距離係遠，但以佢未及水準卻可上名，虛分幾多。

　    「座頭市」如地慢便強化了競爭力。「高手」如果唔係識完全扮懵，單計兩課大閘的走勢，真係唔開胃。「闊袍大袖」係驚出閘反應唔好，睇進度幾快入到局，三兩場應有嘢睇。

第3場  第四班（60-40分）1200米

　　蜚聲對上兩場俱在劣勢下有P，證明晒能力唔係一般同級馬可比，有埋１檔仲正，膽梗。「來福」一向冇緣，只因贏開才揀。

   　 「活力至寶」一場熱身之後可以完全變了另一隻馬，火速的進度，冇理由1Ｗ便收工。「勇蹄飛」前一場好位返嚟唔多已冇藉口，加上曾經痰上頸，揀唔到。「大關刀」好檔易守靚位，成冷更加要拖。

第4場  第四班（60-40分）1600米

　　旺舖福星1000轉1400米照贏，難度好高，就算贏得險，二馬始終在季內賽績好準，印象分要再加，估計跑長二百或仲好。

　    「豪情拍檔」上場前中段守好位，但今場外檔起步可能蝕啲。「日月暉華」上場拉士追追吓貫注力不夠才冇Ｐ，來到大場或更蝕。「愛睦善」少馬走的場合，點都賺多少形勢。「標青」係睇吓幾時執好番跑法而已，計評分幾筍吓。「勁惑」既反覆，在今場亦未必利追。「傑出君子」長期重磅，最多係爭位置。「天之驕子」和「私家路」略欠卡士。

第5場  第二班（100-80分）1200米

　　盈彩繽紛4場未輸過，仲要愈來愈輕鬆，基本上未睇到阻力位喺邊，如果唔係重磅及外檔影響到，5Ｗ冇走雞。

　    「牛精巨星」初出於陣上心情急躁，放得唔自然，但都頂到Ｐ，開氣後希望收斂多少，貫注力或增強。「虎虎生輝」及「富高勝」正路腳。「星運伯爵」遇上有步速場合，會幫到發揮。「桃李滿門」嚟到呢個評分，要谷草短途至惡。

第6場  第三班（80-60分）1600米

　　首騎警流完鼻血復出，仗比仗有追勢，來到今場時間表啱啱好，如非不利後上的話，係時候重現威力。「精算攻略」太準，就算外檔及磅重，亦唔敢飛。

　    「騰雲駕霧」冇步速的環境啱晒，跑番此程亦會比1400米叻。「雨電風雷」成日追得好，湧到入前列唔意外。「馬主精英」係擔心傷過腳會有多大影響。「朝東飛駒」剛仗靚位返嚟唔多，幾失望。「大家開心」又係長期見好，賽前工夫又唔係hea，應保持到該有的水準。「傳奇快車」換人，有幾大憧憬﹗

第7場  國際一級賽 1600米

　　友誼至上中年仲有得增值，的確唔簡單，轉跑此程當比1400米更惡。「自由好」在董事盃僅僅衝輸畀前駒，按能力在此有得爭。

　    「好爸爸」始終係遠征後首場，點都打啲折扣。「再領風騷」似係搏攰咗。「步步穩」呢場有前駒帶住跑，形勢配合到。「大腦」係得個準字。「君子一言」上場係衝得唔錯，睇嚟此程不比1400米失色。「締造美麗」和「勇敢小子」要對住一批年長老虎，蝕點進度和勢頭。

第8場  國際一級賽 2000米

　　閒話一句今季2000米只係輸過畀「萬千景象」，級數之高唔使多講，經過上場中程重新開氣，出擊時間校啱晒。「百威勝」在香港盃明輸畀前駒，唔易反先，但本身能力也數一數二。

　    「爆冷」係幾朝元老，點都有番咁上下，拖腳。「好先生」準得可怕，唔拖佢係拗頸啫﹗「極品絲綢」又係歲數問題吧。「威利旺旺」亦係面對相情況。「首飾奇寶」剛仗亮相時肥過豬，一樣追得勁，呢次轉長途啱數，最有可能出冷就係佢。

第9場  第三班（85-60分）1400米

　　超群如意準得緊要，分數上到8字頭也綁不住佢。「綠色駿駒」前仗唔係演繹得曳，其實好有機會贏，回一回又返此程，再畀機會。

　    「綠續有贏」如腳傷影響輕微，加程可令能力三級跳。「鎗臣」大外檔唔係好怕，因上賽沿途也是外叠蝕。「齊歡唱」和「川滙主帥」唔似贏得，但評分有點優勢。「至勇飛龍」上賽已指出縮程可能仲好爆，好開續可留意。

重心場次

第10場  第一班（105-85分）1400米

　　雅雪贏開又襟弗，上賽更展示到稍留的威力，能力翻一番，目前升穿100分唔覺阻力大，檔好亦易泊位，可食尾胡。

　    「披星戴月」經過兩個大閘令疏懶的狀態重新納入軌道，唞到夠之餘又做番夠才動身，來到季尾有優勢，唔會等熱身。「正黃旗」一經開氣即上位，如呢匹九百幾磅馬的體力唔係頂唔順，唔難再入圍。

　    「鐵拳」前仗才於強組得殿軍，來到一班賽贏點卡士，跑法亦會賺，大冷在此。「聖法理」剛仗跑法睇到心傷，最終得梗頸四，明顯係過分順其自然的惡果，呢次1檔如肯執正番跑法，可能劏晒。「光輝出擊」及「金獅威將」實力未必夠贏，但唔排除會有三三四四﹔「按得快」情況近似，此類長期拒絕大敗之馬，對手一犯錯，便有機可乘。