馮諾嘉手記：天之驕子拉士勁

魑魅魍魉

　　今日有兩場大賽，分別係冠軍一哩賽同女皇盃，前者開辦至今都係港隊馬贏晒，今日當然亦要支持本地馬，好似評分最高嘅「好爸爸」，配腳一席梗要預佢，而小妹最睇好嘅係近仗愈戰愈勇嘅「友誼至上」，近仗跑級際賽不勝有位，前仗角逐董事盃壓倒「自由好」同「好爸爸」，足以證明佢嘅能力，上場縮程跑1400米亦只係以短馬頭位輸畀「鳥語花香」，今場回師最正宗嘅1600米，大可捧盃而回。

撐港隊極品絲綢

　　至於女皇盃嗰場，只得九匹參戰馬，外隊馬更只有三匹，包括上屆盟主「百威勝」，再次來港力圖衛冕，配腳當然要拖，雖然外隊馬以往成績較好，但今屆不妨支持吓港隊，當中小妹最睇好「極品絲綢」，呢匹馬今季成績相當出色，七戰獲五冠兩亞，上場贏香港打吡同樣係跑2000米，狀態咁好，再下一城唔奇。

　　精選場次第一場四班1800米，用「壽比南山」做膽，前仗喺五班初次增程跑1800米，即贏馬開齋，之後打叠贏同程，實力未見盡，有力取得三連捷。配腳先揀上場跑第二嘅「勁擊」，而近兩仗都入位嘅「好旺財」，走勢吸引，拖埋。「濰坊」上場突然跑近，狀態回勇要兼顧。

　　第二場三班1200米，呢場有唔少馬近仗表現都好曳，「駿蹄飛」面對弱旅可乘機贏馬開齋，上場跑谷草1200米，後上以頸位輸畀「祥勝愛駒」屈居亞軍，乘勇再戰，做膽。配腳方面，「共創未來」上場初出即跑第三，熱身一場今次表現應該更理想。「高手」上仗落敗後唞咗一輪，重新做工夫再出，不妨拖埋。冷腳揀在港初出嘅「闊袍大袖」，試閘走勢唔錯，強配柏寶要防。

　　第四場四班1600米，馬膽「天之驕子」，近兩戰獲冠亞各一，上場跑同程，入到直路先發力，拉士造23秒47快時間，追勢凌厲，今場上班孭輕磅，有機會連捷。配腳首選「旺舖福星」，上場爆25 倍冷W走勢出色。而上次強配韋達即贏馬嘅「豪情拍檔」，仲有連場跑近嘅「傑出君子」，都係三甲之選。