阿特蘭大托弗拉唔住

猪拉多纳

意大利盃今晚上演16強賽事，近期走勢強勁嘅阿特蘭大會喺主場對佩斯卡拉。阿特蘭大近6場贏晒表現甚勇，至於對手佩斯卡拉啱啱相反，近6場賽事全部輸晒，加上作客表現麻麻，今仗造訪阿特蘭大應該凶多吉少，阿King推介2.15倍嘅讓球主勝。

（周四凌晨1時開賽，馬會網上文字直播）

阿特蘭大可以話係近期意甲最「弗」嘅球隊，佢哋近6場賽事全部勝出，所贏嘅對手包括羅馬同國際米蘭，而且喺呢6場波入咗13球只係失咗兩球，可見呢班波攻守兼備。阿特蘭大今仗有守衞鴨都拉干高同中場拜仁卡比沙斯因傷缺陣，但主力射手艾真度高美斯同比達拿都可以上陣，主場有力再下一城。
佩斯卡拉殘陣兼狂輸

相反佩斯卡拉可以話係近期意甲狀態最曳嘅球隊，佢哋已經連輸6場兼失咗15球，當中有4場賽事仲冇波入，可見呢班波除攻力平平外，防守亦好有問題。佩斯卡拉現時最大困擾係長時間傷兵滿營，陣中有多達6名球員因傷缺陣，喺陣容不整下仲要作客，相信好難交出好成績，讓球主客和阿特蘭大讓一球，一於捧讓球主勝。

至於其餘兩場意大利盃，巴勒莫近7場波輸晒狀態麻麻，今仗面對喺乙組排第9嘅史柏斯亞，恐怕唔易佔到甜頭，讓球盤巴勒莫讓平半，捧下盤。（周三晚上10時開賽）另一場森多利亞主場表現向來有保證，近3仗主場賽事都贏晒，面對作客腳軟嘅卡利亞里有望輕鬆過關，捧主勝。

（周四凌晨4時開賽）