半場咬唔入聖人

猪拉多纳

阿仙奴未回氣

另一場英格蘭聯賽盃8強，阿仙奴喺主場硬撼「聖人」修咸頓。「兵工廠」啱啱捱過「黑色11月」後元氣大傷，領隊雲格將會貫徹出後備作風，今仗面對近年剋星修咸頓，上半場難免會踢得小心翼翼，阿仙奴近5仗有4仗都係開半場和，近年主場對「聖人」亦經常半場未分高下，「半場和」值得追多鋪。

（周四凌晨3時45開賽、馬會網上文字直播）
盧卡斯佩雷斯帶二線兵出師

阿仙奴喺11月份硬仗連場，對住熱刺、曼聯同巴黎聖日耳門都打和，但球員體能消耗極大，上場聯賽就有迪保治同基奧特受傷。由於大部分主力都需要休息，阿仙奴必會沿用派副選踢聯賽盃傳統，今仗球隊有西班牙射手盧卡斯佩雷斯復出，但成班球員甚少合作，未夾熟之下上半場唔似可以贏到波。

查實「兵工廠」踢法一向慢熱，11月嘅5仗比賽中，有4仗開出半場和。況且修咸頓一向唔易應付，兩隊近7次正面交鋒，阿仙奴只有2勝2和3負，對賽成績略處下風，若單計近3次主場迎戰「聖人」錄得2勝1負，但3仗皆開半場和，加上修咸頓近6仗作客只入2球，鋒力欠佳，今仗造訪酋長球場必穩打穩紮，再開半場和不奇。