馬主論戰

魑魅魍魉

衝鋒槍開火

　　今日我哋隻「衝鋒槍」又上陣，呢隻馬向來谷草表現最好，所以上場跑沙田冇表現都唔算太失望。今次跑番季內贏馬路程谷草1800米，有運抽到一檔起步，計落都有贏馬條件，希望順利贏番一場頭馬喇﹗

　　至於其他心水，鍾意第二場「進勝福星」，雖然初出嗰場跑谷草冇表現，但上場一轉跑田草1200米即刻贏馬，肯定又係蔡廐另一質新惡馬。今次轉番嚟谷草跑，有過場地經驗估計有唔同發揮，同場對手唔強，有權打叠再贏。

梁廷鏘

衝鋒槍熱夠身展雄風

　　谷草日賽不時會有冷門賽果，今次一於推介兩匹有分頭嘅馬。先講第六場「雄風」，在港跑咗十五場都未開齋，無疑係令人有多少失望，但話晒上季曾同「首飾奇寶」串Q，戰鬥力其實唔曳。上場唞咗八個月復出，跟跑而回可當熱身，今次轉嚟谷草一哩對手唔強，話唔定可以發圍。

　　另外要留意第九場「星運伯爵」，雖然早前曾經缺課一輪，但近期操練工夫已經回復正常，試兩課閘亦都有唔錯走勢，今次唞夠復出，話唔定可以一網打盡。

張敬山

加州滿意起筷

　　告東尼近期氣勢雖然畀蔡約翰稍蓋過，但今次東廐有唔少惡馬在陣，我睇好呢個倉口有馬贏。最啱心水係尾場「加州滿意」，跑過一次谷草即勝，證明窄場性能一流，上場跑泥地1650米得第三，更試準埋一哩氣量，今次轉嚟跑谷草1650米，擺明已屆起筷時候。

　　另一匹要留意嘅東廐馬係第五場「稻庭烏冬」，雖然以往曾響田草同泥地上名，但唯一頭馬其實響谷草取得，證明窄場威力最強，後勁馬增程跑2200米難佢唔到，值得吼實。

任達華