留干地定軍心 車仔半場搞掂狐狸

猪拉多纳

闊別一周嘅英超又返嚟喇！今晚重頭大戰當然係車路士主場出擊，迎戰衞冕嘅李斯特城。「狐狸」最近喺歐聯係威係勢，首兩場比賽全勝，兼且保持一球不失，但佢哋喺聯賽就唔多順利喇，由開季至今7戰只係拎到8分。相反，上季經歷過近年最低潮時刻嘅車路士，今季由新主帥干地領軍，表現終於有起色喇！而且，最緊要就係班車仔球員肯聽呢位意大利教頭支笛。今晚車仔主場出擊，相信半場就可以擊退對手，半場主勝係信心之選。

（Now 621及樂視LeSports HK應用程式周六晚上7時30分直播）

神奇球隊李斯特城上場歐聯對波圖，憑着破球會轉會費紀錄加盟嘅史利文尼頂破卡斯拿斯十指關，主場以1比0擊敗對手，成為首支英格蘭球隊喺歐聯首兩戰全勝，兼且不失一球，表現相當搶鏡呀！不過，狐狸歐聯得意，但就喺聯賽失意呀！衞冕英超嘅李城今季聯賽表現有啲失色，先後輸畀侯城、利物浦同曼聯，對住阿仙奴同修咸頓又失分，當中對住曼聯同利物浦嘅兩場比賽更係以1比4慘敗，明顯球隊後防線問題嚴重，尤其係死球嗰陣，班後衞好似突然變得唔識防守咁。
李城防線難適應新例

球隊主力右閘丹尼森遜就話，英超今季嘅新球例，影響咗李斯特城一貫嘅死球防守戰術。皆因今季開始實施嘅新規則當中，球員喺禁區內防守時，如果有拉拽波衫嘅動作就會被嚴厲判罰，球證好可能會判輸12碼，所以令到一班後衞未能適應。今晚李城仲要造訪史丹福橋球場，硬撼開季頗順嘅車路士，相信半場都捱唔住呀！
擊退干地被炒封盤流言

另一邊廂，雖然近日英傳媒大爆，車路士有可能解僱今季新帥干地，就連中國傳媒都話收到獨家猛料，炒人行動好快落實，搞到英國主流菠菜公司將干地被炒賠率為34倍急壓至7倍，甚至有莊家封盤。不過之後又證實係流料，干地同車路士嘅合約一直延續到2018-19球季。事實上干地今季上任之後，安排球隊一日進行兩課操練，同時改變球員嘅飲食習慣，一班車仔兵仲非常受落添！而且，車路士今季唔使踢歐聯，可以集中精神同體力喺聯賽，對球隊嚟講絕對係一個優勢，即使有韋利安因母親去世要處理喪事或缺陣，影響依然唔大。

車仔賽前擊退負面新聞，穩定軍心，球隊上下團結，今晚主場出擊唔會再令車迷失望，心水推介車路士半場主勝。