格仔兵搶芬吼半場大

猪拉多纳

I組賽事，天才橫溢嘅克羅地亞上仗狂數科索沃6蛋，盡顯勁旅霸氣，周日深夜呢班「格仔兵」作客弱旅芬蘭，乘住強勢必定展開瘋狂進攻。克羅地亞火力全開，進攻板斧多樣化，球員又信心爆棚，肯定會趁早搶攻，隨時上半場就會同芬蘭展開激戰，中位數1.5球嘅半場大可以一博。

（有線64及203台周一凌晨零時直播）

克羅地亞今夏歐國盃表現突出，雖然16強被葡萄牙淘汰出局，但球隊嘅天才已深受球迷肯定，尤其一條攻擊線極多元化，文迪蘇傑的制空力屬歐洲一流、比列錫嘅速度同腳法亦極具威脅，即使中堅洛夫雲同中場莫迪歷養傷，克羅地亞亦有足夠兵源搶攻，近4仗比賽就有3仗半場總入球達2球或以上。

主隊芬蘭目前喺小組2戰只得1分，為咗爭出線，上仗作客冰島頭45分鐘就瘋狂逼搶，並且成功領先2比1進入半場，可惜後勁不繼終以2比3落敗。芬蘭今仗返主場，必定沿用上仗上半場成功踢法，同克羅地亞進行逼搶，「半場大」有望順利開出！
同組冰島繼續博「大」霧

同組另一場重頭大戰，由冰島主場迎戰土耳其，神奇球隊冰島延續歐國盃嘅「快樂足球」精神，今屆分組賽先作客烏克蘭打和1比1，上仗主場3比2反勝芬蘭，冰島主場球迷有幾齊心大家記憶猶新，今仗藉地利肯定會主攻同土耳其駁火，2.5球嘅大盤有計！