阿爾巴尼亞好守細

猪拉多纳

G組榜首唔怕「鬥牛」

世盃外歐洲區G組賽事，西班牙作客鬥阿爾巴尼亞。阿爾巴尼亞踢完2輪力壓西班牙、意大利兩大勁旅排榜首，相信對士氣、信心有幫助，而且阿軍踢法守強攻弱，今夏歐國盃決賽周3仗比賽總入球都唔超過2球，遇上作客經常小勝嘅「鬥牛國」，首選中位數2.5球嘅細盤。

（有線61及201台周一凌晨2時45分直播）

G組踢完2輪賽事，阿爾巴尼亞2戰全勝得6分高踞榜首，雖然佢哋仲未對過同組實力最強嘅意大利同西班牙，但對呢個人口仲少過香港嘅歐洲國家嚟講，要爭取首次出席世盃決賽周絕對係個好開始。阿爾巴尼亞今個夏天已創造一次歷史，首次進身歐國盃決賽周，並且擊敗羅馬尼亞取得歷史性勝利，實力已經大躍進，另外兩場比賽，阿爾巴尼亞分別以0比1、0比2僅負瑞士與法國，有一定防守板斧，面對長時間控球在腳、踢法較單調嘅西班牙未必冇得打。
西班牙作客入球率低

西班牙上仗作客1比1打和勁敵意大利，2戰得4分成績可以接受，新領隊洛佩特吉上任後，西班牙仍以「4—5—1」陣式為主，中場以恩尼斯達、大衞施華、布斯基斯做重心，踢法冇大轉變。睇番西班牙喺2016歐國盃外圍賽，5仗作客有3仗贏波都係小勝對手1比0，而且今年踢咗3仗友賽作客總入球都係一球起、兩球止，今仗預計入波都唔多，捧2.5球嘅細盤好路。