比利時波斯尼亞大駁火

猪拉多纳

世盃外歐洲區H組重頭戲，比利時主場鬥波斯尼亞。兩軍被視為呢組出線熱門，今場可以講係爭奪首名嘅關鍵6分波，比利時向來攻強守弱，波斯尼亞亦有當弗嘅迪斯高及伊比斯域壓陣，有力合演入球騷，波童推介中位數2.5球嘅大盤。

（有線62及202台周六凌晨2時45分直播）
強鋒對撼爭H組首名

H組從牌面及國際賽經驗計，首名之爭應不出比利時、希臘及波斯尼亞，呢3支熱門首輪外圍賽亦順利贏波，發展合乎預期。比利時改由馬天尼斯接手、亨利做助教後，首仗比賽喺熱身賽0比2不敵西班牙，但西班牙始終係一線勁旅，比利時未經磨合輸波情有可原。經過一場熱身，比利時上仗喺首輪世盃外作客大勝塞浦路斯3比0，對球員信心、士氣起到刺激作用。比利時今仗雖有中場奇雲迪布尼缺陣，但盧卡古、賓迪基、奧歷治及夏薩特兄弟等前場主力可以候命，無損攻力，何況比利時一向攻強於守，喺高柏尼、華美倫同時養傷嘅情況下，主動進攻反而係最佳防守。

波斯尼亞喺上屆2014世盃外歐洲區以小組首名直接出線決賽周，實力已可跟歐洲列強爭一日之長短。波斯尼亞上屆世盃外亦和希臘同組，今次加上比利時，爭首名難度更大。波斯尼亞首仗以5比0大勝愛沙尼亞，名氣最大嘅迪斯高、伊比斯域齊齊有入波，加上中場有負責校炮嘅罰球專家比真歷，幾名進攻主力狀態都唔錯，作客有本錢跟比利時鬥攻。