錘曼聯搏「半和」好路

猪拉多纳

英超周中上演重量級補賽，由「錘仔」韋斯咸主場迎戰曼聯，今仗勝負對來季歐聯同歐霸資格有直接影響。隨住曼城尋日失分，曼聯今晚只要拎3分就可以殺入前4位，不過主場的韋斯咸同樣要為歐洲賽資格搏殺，兩隊都要搶3分，上半場未必輕舉妄動，今仗開半場和機會高。

（now 621周三凌晨2時45分直播）

曼聯領隊尹戈爾死唔斷氣，如果拎到來季歐聯資格同捧走足總盃冠軍，話唔定真係可以保得住份工，今仗咁關鍵梗係當決賽咁踢啦。尹戈爾出晒名踢法保守，呢場「決賽」當然會以穩為先，事實上「紅魔鬼」作客比賽多先採觀望態度，連同上周六作客對諾域治一仗，曼聯近7仗聯賽作客就有6仗開出半場和。

曼聯目前傷兵都唔少，達美安上仗勇戰受傷，加埋安東尼馬迪爾、舒韋恩史迪加等十字兵，仲有停賽嘅費蘭尼，兵源的確係掹掹緊，不過「紅魔鬼」近6仗比賽有5勝1和佳績，尹戈爾更加唔會隨便改變沿用踢法，今仗上半場肯定大踢悶蛋足球。
韋斯咸人腳唔曳頂得住

韋斯咸今季喺聯賽同盃賽3鬥曼聯2和1負，足總盃輸波一仗亦只係僅負1比2，領隊比歷手上擁有皮耶、蘭仙尼等技術型球員，對住勁旅上半場多採用控球踢法，慢慢搵機會入波，佢哋上輪聯賽意外慘敗喺史雲斯腳下，今仗更加唔敢亂咁攻，上半場和波機會高。