洪禮賢講馬： 齊歡唱轉倉即郁手

纯情小彩迷

　　韋達騎足十場，隔夜最冷嘅馬講緊唔夠９倍，可以講係全線有飛，講笑咁講，如果今日佢贏唔到三幾隻，真係唔及格噃﹗而小楊呢日亦有成手馬集咗喺度，若然連場上名唔係奇事。

重心場次

第8場  第三班（80-60分）1600米威騰駒用到阿巫，對於呢匹衝力唔長嘅馬甚有幫助，有埋２檔幫助，估計食埋形勢，假如跑得番早前輸畀「披星戴月」入Ｑ時水準，有望出頭。

    「生生不息」剛仗發揮曳到極點，頭兩段快至50.6秒，直路點會唔腳軟﹔今場轉場及換人，帶出正面意思，雖則12檔有風險，少馬走場合，好大可能畀佢搶到頭，交得出前仗入Ｐ表現，放到也有可能。「本地實力」一再用留後追也輸近，其實幾難得，估計這次隨着換人及賽事形勢，應會在跑法上變得進取，５檔如畀佢守到好位，可爆。

    「駿馬精英」及「首騎警」剛仗同場各有唔多起眼的追勢，省過後主觀認為兩駒或有進步。「明駿之寶」以為上賽有晒下台階會即刻現形，但實情唔係，稍為失望。「長勝」剛賽個Ｐ係捱番嚟，再加程欠把握。「高耀之威」贏完後至今才再跑此程，撞正一場未必步速快的場合，忽然放得出就危險，唔敢批死。

第1場  第五班（40-10分）1800米

　　金像太子上場已試水，跑來恰如其分，輸給超班馬冇得賴，冇錯，拉士係楔內欄慳咗，但本身亦彈甩晒後列馬，演出有水準。除非１４檔加埋騎者忽然「外遊」，若不，仍有條件爭勝。「百笑」長近卻唔易贏，當然，由1600米轉回此程，點都好追啲。

    「活威小子」唔使多講佢嘅級數，總之在此班1800米，不論田谷草泥，時刻都咁惡。「愛拼者贏」唔排除上場入Ｐ係擺在前的緣故，但沿途擺位蝕章係事實，直路人馬亦唔多協調，如果咁計，那個季軍唔係冇指引性。「勁霸龍」及「心喜悅」剛仗失望。「彩旗飄飄」one pace馬，註定成日近而極難贏。

第2場  第四班（60-40分）1200米

　　覓得寶、「夢寐以求」及「勁辣椒」三隻速度型馬，可能主宰了今場形勢，檔位以後駒最正，１檔有我放，搶欄冇你份，如眼罩幫到令佢重現前速，有權放入三甲。「覓得寶」前仗１４檔也帶到最後直路才稍力弱，隔完一場谷草又返嚟，突然換埋人，隔夜仲有飛，有企圖。

    「夢寐以求」上場1400米當短途咁跑，前中段開34.7秒（當日二班都係35秒咋），喪放了事﹗敗績不用理，只需知道有番該有的速度便成。一降班即回此程，再追。此外，揀無可揀下，要埋「來福」。

第3場  第四班（60-40分）1200米

　　進勝福星初出生勾勾，又挨欄兼轉彎唔順，末段仲唔識跑直線，一樣追得吓，證明手上虛分多的是，肯即刻轉場及增程，只要稍進步已夠贏。「紅旗輝揚」血統早熟，馬樣又靚，大閘用埋眼罩試也見效果，如果唔係得個殼，一出有權劏晒。

    「熱錢」只係擔心陣上條氣順唔順（上賽後呼吸異常）。「風動寶」剛仗在外叠仍見走得規矩，確認不斷進步。「財源來」初出早段好「立」，但拉士識追馬，而早前試閘加罩明顯有幫助，希望陣上亦然。「信賴」上場最後100米根本騎唔到，名次落後不用介意，今場若跑得出水準，入圍唔奇。「驃騎將軍」唔明隔夜啲飛點嚟﹖

第4場  第五班（40-10分）1400米

　　三扒兩撥比較起對上兩場同程的發揮，前仗只係冇咁差，已經衝到入第五名，大抵已反映到目前分數已減至支持點﹔落班突然換人，係好係壞唔知，但班利則是必然，追三次又何妨﹗

    「誠信心」仍念念不忘大前仗入Ｐ的表現，檔好又輕磅，吼得過。

    「五代同堂」做番嘢冇耐，未必趕得起。「駕世鞍」多年上名也有頭罩，配合埋成套準備工夫而來，超班馬係時候抬頭。「威威」退出冇耐可復課，影響唔會大，排２檔啱晒佢發揮，用到韋達亦似樣。「百威紀錄」和「連冠精英」買Ｆ可拖埋。

第5場  第四班（60-40分）1400米

　　神勇將軍總覺目前短途唔啱，等佢跑中程已有一段時間，來到落班的第四回合終肯行這一步，用埋韋達而排好位，應該會跑得好好睇睇。「雄心威龍」一轉程可變身，難度其實好高，如外檔唔係令佢放都放唔出，應可喼住成績。

    「確叻星」一再失望，落班仍冇起色，不過，今場如受惠步速快，或有轉機。「辣得喜」上場出閘唔慢，陣上「片」的毛病也減少，重新開氣後嘗試加程，或是好事。「森淼獵鷹」略嫌上場末段唔多韌，四連環腳則可拖。「劍鋒」唔知放唔放，肯帶或會唔同晒。

第6場  第四班（60-40分）1600米

　　喜綵終於要換人，之前唔係跑到要勒避，就係發力過早，有時睇到幾眼冤﹔出動到柏寶，意義得一個吧，就係想交代，話晒曾與「飛躍之旅」同程搏鎚，呢棚馬邊係佢手腳。「福到財星」剛仗短直路也可爆到上嚟，轉場冇理由衰。

    「名人」或繼續遇到一場冇乜步速的有利環境，未必唔可以再博懵。「標青」唔係場場都被動啩，尤其今場１檔，同埋阿巫就走嘞，肯執正跑法，呢匹減分過籠馬隨時爆得。「連利威勁」與「勁惑」三三四四之流。

第7場  第三班（80-60分）1200米

　　相見歡及「豐衣足食」一對姚廐馬，各有優點，前駒勝在準及重返田草，後駒則贏出一股勢頭，有權埋馬房Ｑ。

    「天久」初出在亮相圈時，臨場行到腳震震，但陣上卻是兩回事，反映起步分甚有利。「十則圍之」係信轉馬房效應而已。「霹靂槍」多馬搶，未必有前一仗的形勢。

第9場  第二班（100-75分）1000米

　　齊歡唱試大閘唔慢，贏來自動波，做得好夠才動身，按上場由頭錯到尾，一樣輸近，二班點會冇碇企，還要負118磅，有望轉倉即勝。「喜萬家」回到主項，配合埋有利跑線，負磅又輕，整體條件理想。

　　「福勝滿載」贏完hea咗一排，而今賽前又唔似得上場咁，缺少了一課大閘，略有戒心。「酒勝」神奇馬返回此程可能駁番纜。「富高勝」、「桃李滿門」和「明燈」，唔似贏得，卻有本事上名。

第10場  第三班（80-60分）1400米

　　歡樂繽紛跑親冇Ｗ有Ｑ，實力不用多講，膽材。「談笑用兵」加程應好，問題係初次嘗試而已。「至勇飛龍」跑短啲或更啱發揮。

    「哈哈大少」1600米盲門都長期追一段，終於肯回到此程，威力大增。「聖河」四平八穩。「多多昇」此程把握性不大，所以就算剛仗追得好都係咁話。「海王子」一而再失望。「金添好運」隔夜飛完全唔似有意思想搏。