西甲三雄集體獻細

猪拉多纳

西甲三雄陷入兩難，歐聯生死戰前夕，今晚聯賽搏唔搏？巴塞隆拿、馬德里體育會、皇家馬德里唔止喺聯賽激鬥，下周中仲要應付歐聯8強次回合，三隊晉級之路同樣難行，權衡輕重之後，今輪聯賽或先「停火」留力，全部揀入球細！
巴塞輪換難炒皇蘇

榜首巴塞隆拿作客皇家蘇斯達，射手蘇亞雷斯停賽，變相確保有得抖，叉足電下周中再鬥馬體會。事實上，巴塞上仗歐聯幾乎燒鬚，多得對方前鋒費蘭度托利斯上半場鹵莽被逐，先至可以反勝2比1，但始終畀馬體會攞到作客入球，次回合作客好難踢。由於聯賽仍領先次席馬體會6分，相信教練安歷基今仗唔怕輪換主力，難炒皇家蘇斯達，中位數2.5/3球，揀入球細。

（now632周日凌晨2時30分直播）
馬體會對愛奴7連細

「二哥」馬德里體育會作客愛斯賓奴，同樣有顧忌，畢竟球隊人腳唔及巴塞充裕，教練施蒙尼更加要慳住使，否則搞到回唔切氣，歐聯次回合就難以收復失地。事實上，馬體會以往對愛斯賓奴，悶戰居多，近7次對賽全部開細，當中只得1場總入球係2球，今場入球細僅1.52倍，熱得有道理。

（now632周日凌晨零時15分直播）
皇馬遇伊巴缺賓施馬

至於「三哥」皇家馬德里上周中歐聯首回合吞禾夫斯堡兩蛋之餘，仲有射手賓施馬受傷，估計今仗主場對伊巴難以披甲，另外莫迪歷同基羅拿華斯亦預告定休息。皇馬落後巴塞7分，聯賽捧盃機會甚微，預料教練施丹多數集中全副精神，準備下周中歐聯點樣反勝禾夫斯堡，唔會浪費太多體力喺伊巴身上。同埋皇馬首循環都只係小勝伊巴2比0，今場中位數3.5球捧入球細。

（now632周六晚10時直播）