借題發揮：打吡賽眾台柱問號多多 勇敢小子衝擊魔咒

纯情小彩迷

　　今屆打吡大賽的確係幾緊湊，唔好講平均水準係提高咗定降低咗，因為就算參賽馬分數拉勻計比上屆少啲又點，講到劇味唔會比上屆失色，反而仲好睇咗，始終上屆來來去去都係得「閒話一句」和「自由好」掛在口唇邊，但望落呢屆就多嘢講好多，至少有5駒大家會提住，「締造美麗」、「勇敢小子」、「君子一言」、「至勇威龍」、「極品絲綢」，而佢哋亦充滿話題噃！

　　上述5駒骨子裏各有問號存在，唔係隻隻都係台柱，首先係「締造美麗」，2000米到唔到呢？都係博一博啫。「勇敢小子」最大嘅問號，當然係七捷魔咒，每季六連捷嘅例子都唔多，整夠七W更史無前例，如果衝破埋呢項盲門數據，韋達真係幾「好眼光」喎！「君子一言」有幾叻，可能仲未有答案，成日腳痛唔多操得都贏兩場，呢次做得嘢會唔會更勁，唔知，但佢在外地和香港只跑過1400米就真嘅，唔似得其他對手衰衰哋都在1800米有過經驗，應唔應付到兩睇啦？！

極品絲綢睇韋達發揮

　　「至勇威龍」曾在此程由上手騎師欠佳的發揮下仍有P，路程性能唔會有問題，不過贏完打吡預賽，再攻陷埋正本戲，唔易完成係人都知，近年強如「俊歡騰」都差一步，看看佢有冇本事繼「告魯夫」後，贏打吡孖寶。而「極品絲綢」嘅難處，好明顯係韋達啦！？九屆冠軍騎師卻未在港贏過此盃，真是奇景吧！而眼見上場又真係佢出彎走得蝕咗及直路早踩油，返嚟才鬥輸，所以隻馬能力唔係冇，鞍上人才是最大關鍵。

亨利