馮諾嘉手記：駕寶縮程見真章

纯情小彩迷

　　聽日沙田賽事，除有兩場泥地賽舉行之外，頭場仲安排咗場1000米新馬賽，只得七匹馬參戰。噚日同一位前輩講起呢場賽事，佢即刻想當年，仲話七匹馬跑唔算少，事關響賓康仍在港從練嘅年代，曾經試過有一場賽事只得三匹馬上陣，另一位更資深嘅馬迷仲話，以往更試過一場賽事只得兩匹馬鬥。

　　小妹心諗，咁少馬跑嘅場合咪好容易中？不過，前輩就話當時並冇咁多資訊同數據畀你刨，所以仍然有唔少馬迷響馬少場合食白果。講番聽日場新馬賽，小妹比較睇好「獵豹小子」，呢匹馬前後試過三課大閘，月初試嗰課1000米閘，後上趕過「大隊長」取得首名，走勢相當吸引，有權初出即勝。

　　第六場四班泥地1650米，小妹揀咗「天寶之威」做膽，上場響谷草一哩入Q，似乎狀態返咗嚟，同父馬「又快又勁」泥地都掂，今次轉嚟泥地上陣絕非無的放矢，柏寶唔放手有計。配腳方面，「稻庭烏冬」前仗響泥地同程入位，要繼續吼實。「爆發力」一檔易發揮，咪睇小。「健康藍莓」跑法夠主動，十四檔都有權一早切入，四連環拖埋「友誼奧運」。

　　第九場三班1200米，小妹鍾意姚廐「駕寶」，季內兩戰此程全部贏晒，近兩仗增程跑1400米均跑第五，路程似乎稍嫌長，今次縮程跑番強項1200米，應該會有唔同發揮，坐亞望冠。配腳先拖「幸運愛駒」，近三仗獲兩冠一季演出夠準，三甲好穩陣。「明燈」上場有走勢，蔡廐質新馬幾時都唔可以睇小。「劍鋒」、「進取」都有分在手，宜一併兼顧。