盃賽特色：今季盃賽有路捉 要捧大摩韋達

纯情小彩迷

    　【本報資料】季內一共上演過47場盃賽，練馬師以大摩表現最好，一共贏出九W，當中包括香港短途錦標預賽及香港盃預賽。練者一早表明要做獎金王，重要盃賽固然不會放過。至於，騎師方面，蔡明紹捧走七盃最威，不過今戰仍要停賽，其後輪到5W的九屆冠軍韋達。今日兩場盃賽大可以揀摩廐馬及韋達坐騎做重心。

　    第七場百周年短途盃，可向大摩「紀利威龍」埋手，睇番大摩季內已有「鳥語花香」捧走沙田短途錦標及香港短途錦標預賽，又有「創惑」捧走精英碗，重要短途盃賽打晒骰。今戰「紀利威龍」雖然要蝕分上陣，但剛於柏威廉胯下贏同程捧走紫荊短途錦標，人馬合作及馬匹同程均有根據。

　    最重要是主要對手如「蓮華生輝」及「同一世界」等均於國際賽硬拼過，體力付出不少，「紀利威龍」憑着勇態及較佳體力可爆冷。另外，韋達「紅衣司令」，上仗久休復出負重磅跑1000米，以短距離失去位置，今日操足平磅再臨，有力闖入三甲。

閒話一句超晒班

　    至於第八場董事盃，雖然大摩「閒話一句」過往兩戰1600米都不入三甲，但上仗香港盃與「萬千景象」雙雙拋離其他馬，顯示出「閒話一句」進步神速，中長途實力亦遠勝今場對手，有信心可順利贏馬。而韋達胯下的「好日子」一連兩仗跑1400米入位，表現復甦，今日增程跑1600米一定更加合適，有力走入三甲。