洪禮賢講馬：軍士表明心意

纯情小彩迷

　　今期幾個大馬房出馬好多，最誇張係大摩，出夠十六匹，斷唔會又係雷聲大雨點小啩﹗﹖事關仄番佢對上一次單日贏多過一Ｗ，原來已經係15/11嘅事，如果呢期仍然日行一善，恐怕會成地眼鏡。

重心場次

第5場  第四班（65-40分）1400米

　　軍士由前仗開始揀，該場入Ｑ輸少少，上賽則輸在成條直路喺對手屁股後面，根本動彈不得，敗績不用理。今次落班跑此程，仲忽然用到柏寶（來港季幾人馬首次合作），大抵賀賢已表明心意，想早贏早交代，若交番出前仗水準，穩勝。

　    「好心星」前景係秀麗，問題係首次跑此程，仲要排外檔，際遇一唔好，隨時「窩河」﹗﹖「天瞳」近兩場大有欲蓋彌彰之感（尤以上場），希望今次落班兼增程，會有理想發揮。「駿馬繽紛」一檔又遇上少馬放場合，呢匹班內同程好手或可偷襲。

    　「高智慧」擔心大外檔的際遇會似近仗。「聖迪達」外檔如又令佢出錯腳，有機會大敗。「大進」計馬要揀，惜今季騎練田草未好過（6駒冇前五名），限於T或F拖腳。「八逢九紫」第一次降到四班，唞番一輪亦有助，冷門此中尋。

第1場  第五班（40-10分）1200米

　　高鳴連續兩場入Ｑ，證明五班可以打橫行，回到此程只會更勁。「驍騎無敵」眼罩幫到手，隔番個幾月亦有好冇壞。

　    「華忠寶」上場唔算弗也有Ｐ，食緊老本是也，寄望經上場令狀況更紮實，能力便更大。 「一路易」降班有利，但佢似係冇欄冇命嗰類馬，八檔要睇際遇。「晨速」表現好與壞，視乎早段步速快唔快。「放縱」一檔易掌握形勢。

第2場  第四班（60-40分）1200米

　　歡樂繽紛曾經傷過，但做番夠至復出，如果重磅和大外檔影響非過巨，幾難贏唔到。「松林之星」此程準但難贏（季內三場俱入Ｑ）。

　    「時時攞彩」大閘教到留力，但落場跑唔知得唔得，要博。「成功網絡」約一個月跑一場，演出幾靠得住。「好運精選」增程及內檔俱有利。「信賴」季內整體成績唔理想。

第3場  第三班（80-60分）1600米

　　軍刀轉到此程，效果會比停留1400米好得多，亦喜見上場臨場情緒乖咗，只要進度冇停，呢次有望出頭。「駿馬精英」及「印度光輝」卡士夠晒，奈何各有缺點，前駒二百幾日冇跑過，後駒則大外檔。

    　「飛躍之旅」上場又係留得太後影響發揮，希望今場用小楊會唔同，有能力爭二二三三。「電訊高星」連敗兩場其實與實力無關，有賠率可博埋今場。「大將風範」長期會追得近，邊線腳。

第4場  第三班（80-60分）1200米

　　六六精英體質所限，唔係咁襟搏，水準能否維持真係兩睇，但由於向來演出準，正路之選。「千江映月」初出嚇人一跳，跑多步連「高手」條Ｑ都擸埋，反映六十餘分起步着數到暈。

　    「綠續有贏」外地賽績以中長途為主，不過試大閘幾好速度，如之前傷患影響唔大，有權一出即有表現。「駿蹄飛」兩場都係漏閘而追得好，突用柏寶點都睇高多少（今季騎練兩匹合作馬贏晒）。「談笑用兵」初出表現收貨，但感覺上仍要多點跑頭。「富高勝」出閘唔失靈，隨時又返嚟。

第6場  第三班（85-60分）2000米

　　旺國手大部分有好表現時都係戴配件，所以季內遲遲冇成績唔奇，呢次等到啱路程，配件即有變動，仲唔係落點﹗﹖「悅璐孖寶」及「納帕二號」近績「骨」，但此程性能唔多唔少要靠估。

    　「神風先驅」1600米都有P，可見三班唔會冇得揮，尤其今場回到長途。「銀影激光」按近仗演出及血統背景，轉到同程可能更叻。

第7場  本地一級賽 1000米

　　蓮華生輝叻成點唔使講咁多，總之操練進程冇問題，又唔係有咩傷過，冇理由唔係擂台躉。「同一世界」上次國際賽同前駒串Ｑ，呢次一樣有本錢，尤其排檔理想。

　    「時尚風采」直路賽更難追，不過秤落已是第三勢力。「綠色駿威」情況與前駒差唔多。「紀利威龍」唔再係讓磅賽，不易攞到甜頭。

第8場  本地一級賽 1600米

　　好爸爸上賽前已指出唔好理「鳥語花香」點勁點勁，總之佢係當代一哩王，贏得險又如何，今場平磅當然有着數。「再領風騷」此程略不及1400米，爭腳居多。「閒話一句」1600米路短，未必爆到上嚟。

　　「步步穩」和「好利威」邊線配腳。「友誼至上」只係輸唔夠一個身位畀「好爸爸」，點會冇上名本錢。

    　「好日子」係靚番，但呢場對手惡，唔容易逞強。「自由好」上仗加眼罩演出失望，可能配件唔啱使。「包裝大師」好難一如沙田錦標咁，畀佢慢放偷雞。

第9場  第二班（100-80分）1600米

　　鎗臣縮回此程點都比1800米易應付，有埋內檔幫手仲更好跑，若然今場步速唔快，佢呢類守好位跑法之馬仲煞食。「賞惑」對手實力大幅下降，加上預計跑法會賺，勿過早放棄。

    　「按得快」跑番起狀態，八十餘分隨時贏得。「藍天」冇乜板斧，只係成日輸唔遠，過熱只宜作配。「精彩」陣上又見復現追勢。「朝東之寶」前仗贏後未知幾時回夠氣。

第10場  第二班（100-80分）1200米

　　高點和「虎虎生輝」各有賣點，前駒在此班1200米挺勁（5戰得2冠1亞1殿1第五），而轉程加罩，用意也好﹔後駒過去7場最差第四名，準到咁點可以唔揀。

　    「正本仁心」係衰在外檔起步。「威利嘉」只係贏「高手」的賽績，在此未必夠撼，尊重新勝之勢則可考慮吓。「比翼雙飛」加點新鮮感，此程未必勝任不來。「酒勝」剛斷纜，加上今次轉程，未宜憧憬。「百利先生」仲係跑唔出水準。