馮諾嘉手記：韋達確係萬人迷

聪明的白痴

　　跑馬嘅內幕貼士向來多不勝數，一時就馬房來料，一時又馬主來料。如果入到馬主廂房，來料就更加多，有時會贏得好應棍，但更多時係輸到冇影。

　　一般嚟講，小妹收到貼士之後，都會先睇吓係咪啱自己心水，如果撞啱來料提供初出馬，冇賽績可依，小妹就會睇番呢匹馬嘅準備工夫如何，但有時都會中招。好似剛戰「電子金麟」同「魔法幻影」，賽前已經有風吹出話會一出即勝，而小妹睇過佢哋晨課準備都做足，所以都有貼呢兩隻馬，點知雙雙跑到冇影。反而告廐「我愛您」，賽前雖然都有來料話爆得出，但小妹見佢晨課準備唔多似，所以冇貼到佢，點知差少少就爆出大冷W。

　　講番今次賽事，頭場五班1650米，小妹揀咗「甜蜜至上」做膽，七歲馬評分已降至39分新低，計落已有反彈餘地，近幾場跑四班賽都輸唔遠，今次落班兼強配韋達必謀交代，配腳拖番「龍子」、「華劍寶」、「年年開心」同「電訊財星」。

　　第二場四班1200米，小妹同樣吼實韋達坐騎「萬人迷」，近兩仗先後響同程跑第四，前仗以半個馬位輸畀「成功年代」，上場亦只係輸畀頭馬「大旋風」個多馬位，今次抽到黃金一檔，係時候打開勝門。

　　配腳方面，「帶利財子」上場響同程一放到底贏馬，四歲馬終於踏入正軌，估計升浪仲未完，一定要吼實。「鄉村傳奇」今季跑四班賽場場近，必須重視。「四季大同」來港後仲未交代，趁有勇態一定會搏。「太陽昇」遇啱形勢就會跑近，可以拖埋。