馮諾嘉手記： 魔法幻影初出即食

聪明的白痴

　　好快就到農曆新年，嚟緊嘅年初一都幾特別，皆因當日正好係西方情人節。雖然仲有幾個禮拜先到呢個特別日子，但係小妹已經有唔少朋友講緊當日點過先好，到底應該陪女朋友定係陪屋企人拜年呢？

　　小妹有位朋友以往未試過帶女朋友返屋企，更諗住趁呢個特別日子，帶埋女朋友返屋企見家長兼拜年，話咁樣一定夠晒難忘喎！小妹就認為做事最緊要有心，正所謂「十月都是拜年時」，講「我愛你」都唔一定要等情人節喇。

　　好似聽日馬迷就有機會響馬場內「示愛」，皆因第五場告廐有匹新馬「我愛您」首度登場。諗起評馬人介紹呢隻馬時，會口口聲聲講「我愛您」，小妹就覺得好搞笑！不過，呢隻馬進度似乎未係好夠，投注上小妹就未必會兼顧。

　　呢場四班1600米賽事，小妹都係揀番「國寶」做膽，在港跑三場非勝即位，上場初跑1400米亦照贏，實力一定唔簡單，開竅後可以扶搖直上。配腳方面，「喜綵」上仗力拼僅敗，今次必定捲土重來。「勁快」跑法夠主動，排外檔都要吼實。「好旺財」四歲當打，要繼續兼顧。「招積仔」柏寶唔放手，拖埋冇蝕底。

　　另外，第七場一班1400米，小妹就鍾意摩廐「魔法幻影」，聽講呢匹馬身價不菲，響德國贏過三場賽事，來頭一啲都唔細，更有傳實力分分鐘高過馬王「爆冷」，今次初出一定要捧場，配腳拖番「好日子」、「火箭動力」、「新力勁」同「魄力寶」。